Eze 40 | THOT | STEP | בְּ עֶשְׂרִ֣ים וְ חָמֵ֣שׁ שָׁנָ֣ה לְ֠ גָלוּתֵ נוּ בְּ רֹ֨אשׁ הַ שָּׁנָ֜ה בֶּ עָשׂ֣וֹר לַ חֹ֗דֶשׁ בְּ אַרְבַּ֤ע עֶשְׂרֵה֙ שָׁנָ֔ה אַחַ֕ר אֲשֶׁ֥ר הֻכְּתָ֖ה הָ עִ֑יר בְּ עֶ֣צֶם ׀ הַ יּ֣וֹם הַ זֶּ֗ה הָיְתָ֤ה עָלַ י֙ יַד ־ יְהוָ֔ה וַיָּבֵ֥א אֹתִ֖ י שָֽׁמָּ ה ׃

Ezekiel 40

1 בְּעֶשְׂרִים וְחָמֵשׁ שָׁנָה לְגָלוּתֵנוּ בְּרֹאשׁ הַשָּׁנָה בֶּעָשׂוֹר לַחֹדֶשׁ בְּאַרְבַּע עֶשְׂרֵה שָׁנָה אַחַר אֲשֶׁר הֻכְּתָה הָעִיר בְּעֶצֶם׀ הַיּוֹם הַזֶּה הָיְתָה עָלַי יַד־יְהוָה וַיָּבֵא אֹתִי שָֽׁמָּה׃ 2 בְּמַרְאוֹת אֱלֹהִים הֱבִיאַנִי אֶל־אֶרֶץ יִשְׂרָאֵל וַיְנִיחֵנִי אֶל־הַר גָּבֹהַּ מְאֹד וְעָלָיו כְּמִבְנֵה־עִיר מִנֶּֽגֶב׃ 3 וַיָּבֵיא אוֹתִי שָׁמָּה וְהִנֵּה־אִישׁ מַרְאֵהוּ כְּמַרְאֵה נְחֹשֶׁת וּפְתִיל־פִּשְׁתִּים בְּיָדוֹ וּקְנֵה הַמִּדָּה וְהוּא עֹמֵד בַּשָּֽׁעַר׃ 4 וַיְדַבֵּר אֵלַי הָאִישׁ בֶּן־אָדָם רְאֵה בְעֵינֶיךָ וּבְאָזְנֶיךָ שְּׁמָע וְשִׂים לִבְּךָ לְכֹל אֲשֶׁר־אֲנִי מַרְאֶה אוֹתָךְ כִּי לְמַעַן הַרְאוֹתְכָה הֻבָאתָה הֵנָּה הַגֵּד אֶת־כָּל־אֲשֶׁר־אַתָּה רֹאֶה לְבֵית יִשְׂרָאֵֽל׃ 5 וְהִנֵּה חוֹמָה מִחוּץ לַבַּיִת סָבִיב׀ סָבִיב וּבְיַד הָאִישׁ קְנֵה הַמִּדָּה שֵׁשׁ־אַמּוֹת בָּֽאַמָּה וָטֹפַח וַיָּמָד אֶת־רֹחַב הַבִּנְיָן קָנֶה אֶחָד וְקוֹמָה קָנֶה אֶחָֽד׃ 6 וַיָּבוֹא אֶל־שַׁעַר אֲשֶׁר פָּנָיו דֶּרֶךְ הַקָּדִימָה וַיַּעַל בְּמַעֲלוֹתוֹ ^{▼▼For Ketiv בְּמַעֲלוֹתוֹ Qere= בְּמַֽעֲלוֹתָיו} וַיָּמָד׀ אֶת־סַף הַשַּׁעַר קָנֶה אֶחָד רֹחַב וְאֵת סַף אֶחָד קָנֶה אֶחָד רֹֽחַב׃ 7 וְהַתָּא קָנֶה אֶחָד אֹרֶךְ וְקָנֶה אֶחָד רֹחַב וּבֵין הַתָּאִים חָמֵשׁ אַמּוֹת וְסַף הַשַּׁעַר מֵאֵצֶל אוּלָם הַשַּׁעַר מֵֽהַבַּיִת קָנֶה אֶחָֽד׃ 8 וַיָּמָד אֶת־אֻלָם הַשַּׁעַר מֵהַבַּיִת קָנֶה אֶחָֽד׃ 9 וַיָּמָד אֶת־אֻלָם הַשַּׁעַר שְׁמֹנֶה אַמּוֹת וְאֵילוֹ ^{▼▼For Ketiv וְאֵילוֹ Qere= וְאֵילָיו} שְׁתַּיִם אַמּוֹת וְאֻלָם הַשַּׁעַר מֵהַבָּֽיִת׃ 10 וְתָאֵי הַשַּׁעַר דֶּרֶךְ הַקָּדִים שְׁלֹשָׁה מִפֹּה וּשְׁלֹשָׁה מִפֹּה מִדָּה אַחַת לִשְׁלָשְׁתָּם וּמִדָּה אַחַת לָאֵילִם מִפֹּה וּמִפּֽוֹ׃ 11 וַיָּמָד אֶת־רֹחַב פֶּֽתַח־הַשַּׁעַר עֶשֶׂר אַמּוֹת אֹרֶךְ הַשַּׁעַר שְׁלוֹשׁ עֶשְׂרֵה אַמּֽוֹת׃ 12 וּגְבוּל לִפְנֵי הַתָּאוֹת אַמָּה אֶחָת וְאַמָּה־אַחַת גְּבוּל מִפֹּה וְהַתָּא שֵׁשׁ־אַמּוֹת מִפּוֹ וְשֵׁשׁ אַמּוֹת מִפּֽוֹ׃ 13 וַיָּמָד אֶת־הַשַּׁעַר מִגַּג הַתָּא לְגַגּוֹ רֹחַב עֶשְׂרִים וְחָמֵשׁ אַמּוֹת פֶּתַח נֶגֶד פָּֽתַח׃ 14 וַיַּעַשׂ אֶת־אֵילִים שִׁשִּׁים אַמָּה וְאֶל־אֵיל הֶֽחָצֵר הַשַּׁעַר סָבִיב׀ סָבִֽיב׃ 15 וְעַל פְּנֵי הַשַּׁעַר הַיֹּאתוֹן ^{▼▼For Ketiv הַיֹּאתוֹן Qere= הָֽאִיתוֹן} עַל־לִפְנֵי אֻלָם הַשַּׁעַר הַפְּנִימִי חֲמִשִּׁים אַמָּֽה׃ 16 וְחַלֹּנוֹת אֲטֻמוֹת אֶֽל־הַתָּאִים וְאֶל אֵלֵיהֵמָה לִפְנִימָה לַשַּׁעַר סָבִיב׀ סָבִיב וְכֵן לָאֵֽלַמּוֹת וְחַלּוֹנוֹת סָבִיב׀ סָבִיב לִפְנִימָה וְאֶל־אַיִל תִּמֹרִֽים׃ 17 וַיְבִיאֵנִי אֶל־הֶֽחָצֵר הַחִיצוֹנָה וְהִנֵּה לְשָׁכוֹת וְרִֽצְפָה עָשׂוּי לֶחָצֵר סָבִיב׀ סָבִיב שְׁלֹשִׁים לְשָׁכוֹת אֶל־הָרִֽצְפָֽה׃ 18 וְהָרִֽצְפָה אֶל־כֶּתֶף הַשְּׁעָרִים לְעֻמַּת אֹרֶךְ הַשְּׁעָרִים הָרִֽצְפָה הַתַּחְתּוֹנָֽה׃ 19 וַיָּמָד רֹחַב מִלִּפְנֵי הַשַּׁעַר הַתַּחְתּוֹנָה לִפְנֵי הֶחָצֵר הַפְּנִימִי מִחוּץ מֵאָה אַמָּה הַקָּדִים וְהַצָּפֽוֹן׃ 20 וְהַשַּׁעַר אֲשֶׁר פָּנָיו דֶּרֶךְ הַצָּפוֹן לֶחָצֵר הַחִֽיצוֹנָה מָדַד אָרְכּוֹ וְרָחְבּֽוֹ׃ 21 וְתָאוֹ ^{▼▼For Ketiv וְתָאוֹ Qere= וְתָאָיו} שְׁלוֹשָׁה מִפּוֹ וּשְׁלֹשָׁה מִפּוֹ וְאֵילוֹ ^{▼▼For Ketiv וְאֵילוֹ Qere= וְאֵילָיו} וְאֵלַמּוֹ ^{▼▼For Ketiv וְאֵלַמּוֹ Qere= וְאֵֽלַמָּיו} הָיָה כְּמִדַּת הַשַּׁעַר הָרִאשׁוֹן חֲמִשִּׁים אַמָּה אָרְכּוֹ וְרֹחַב חָמֵשׁ וְעֶשְׂרִים בָּאַמָּֽה׃ 22 וְחַלּוֹנוֹ ^{▼▼For Ketiv וְחַלּוֹנוֹ Qere= וְחַלּוֹנָיו} וְאֵלַמּוֹ ^{▼▼For Ketiv וְאֵלַמּוֹ Qere= וְאֵֽלַמָּיו} וְתִמֹרוֹ ^{▼▼For Ketiv וְתִמֹרוֹ Qere= וְתִמֹרָיו} כְּמִדַּת הַשַּׁעַר אֲשֶׁר פָּנָיו דֶּרֶךְ הַקָּדִים וּבְמַעֲלוֹת שֶׁבַע יַֽעֲלוּ־בוֹ וְאֵילַמּוֹ ^{▼▼For Ketiv וְאֵילַמּוֹ Qere= וְאֵֽילַמָּיו} לִפְנֵיהֶֽם׃ 23 וְשַׁעַר לֶחָצֵר הַפְּנִימִי נֶגֶד הַשַּׁעַר לַצָּפוֹן וְלַקָּדִים וַיָּמָד מִשַּׁעַר אֶל־שַׁעַר מֵאָה אַמָּֽה׃ 24 וַיּוֹלִכֵנִי דֶּרֶךְ הַדָּרוֹם וְהִנֵּה־שַׁעַר דֶּרֶךְ הַדָּרוֹם וּמָדַד אֵילוֹ ^{▼▼For Ketiv אֵילוֹ Qere= אֵילָיו} וְאֵילַמּוֹ ^{▼▼For Ketiv וְאֵילַמּוֹ Qere= וְאֵילַמָּיו} כַּמִּדּוֹת הָאֵֽלֶּה׃ 25 וְחַלּוֹנִים לוֹ וּלְאֵילַמּוֹ ^{▼▼For Ketiv וּלְאֵילַמּוֹ Qere= וּלְאֵֽילַמָּיו} סָבִיב׀ סָבִיב כְּהַחֲלֹּנוֹת הָאֵלֶּה חֲמִשִּׁים אַמָּה אֹרֶךְ וְרֹחַב חָמֵשׁ וְעֶשְׂרִים אַמָּֽה׃ 26 וּמַעֲלוֹת שִׁבְעָה עֹלוֹתוֹ ^{▼▼For Ketiv עֹלוֹתוֹ Qere= עֹֽלוֹתָיו} וְאֵלַמּוֹ ^{▼▼For Ketiv וְאֵלַמּוֹ Qere= וְאֵֽלַמָּיו} לִפְנֵיהֶם וְתִמֹרִים לוֹ אֶחָד מִפּוֹ וְאֶחָד מִפּוֹ אֶל־אֵילוֹ׃ ^{▼▼For Ketiv אֵילוֹ׃ Qere= אֵילָֽיו׃} 27 וְשַׁעַר לֶחָצֵר הַפְּנִימִי דֶּרֶךְ הַדָּרוֹם וַיָּמָד מִשַּׁעַר אֶל־הַשַּׁעַר דֶּרֶךְ הַדָּרוֹם מֵאָה אַמּֽוֹת׃ 28 וַיְבִיאֵנִי אֶל־חָצֵר הַפְּנִימִי בְּשַׁעַר הַדָּרוֹם וַיָּמָד אֶת־הַשַּׁעַר הַדָּרוֹם כַּמִּדּוֹת הָאֵֽלֶּה׃ 29 וְתָאוֹ ^{▼▼For Ketiv וְתָאוֹ Qere= וְתָאָיו} וְאֵילוֹ ^{▼▼For Ketiv וְאֵילוֹ Qere= וְאֵילָיו} וְאֵלַמּוֹ ^{▼▼For Ketiv וְאֵלַמּוֹ Qere= וְאֵֽלַמָּיו} כַּמִּדּוֹת הָאֵלֶּה וְחַלּוֹנוֹת לוֹ וּלְאֵלַמּוֹ ^{▼▼For Ketiv וּלְאֵלַמּוֹ Qere= וּלְאֵלַמָּיו} סָבִיב׀ סָבִיב חֲמִשִּׁים אַמָּה אֹרֶךְ וְרֹחַב עֶשְׂרִים וְחָמֵשׁ אַמּֽוֹת׃ 30 וְאֵֽלַמּוֹת סָבִיב׀ סָבִיב אֹרֶךְ חָמֵשׁ וְעֶשְׂרִים אַמָּה וְרֹחַב חָמֵשׁ אַמּֽוֹת׃ 31 וְאֵלַמּוֹ ^{▼▼For Ketiv וְאֵלַמּוֹ Qere= וְאֵלַמָּיו} אֶל־חָצֵר הַחִצוֹנָה וְתִמֹרִים אֶל־אֵילוֹ ^{▼▼For Ketiv אֵילוֹ Qere= אֵילָיו} וּמַעֲלוֹת שְׁמוֹנֶה מַעֲלוֹ ^{▼▼For Ketiv מַעֲלוֹ Qere= מַעֲלָֽיו} 32 וַיְבִיאֵנִי אֶל־הֶחָצֵר הַפְּנִימִי דֶּרֶךְ הַקָּדִים וַיָּמָד אֶת־הַשַּׁעַר כַּמִּדּוֹת הָאֵֽלֶּה׃ 33 וְתָאוֹ ^{▼▼For Ketiv וְתָאוֹ Qere= וְתָאָיו} וְאֵלוֹ ^{▼▼For Ketiv וְאֵלוֹ Qere= וְאֵלָיו} וְאֵלַמּוֹ ^{▼▼For Ketiv וְאֵלַמּוֹ Qere= וְאֵֽלַמָּיו} כַּמִּדּוֹת הָאֵלֶּה וְחַלּוֹנוֹת לוֹ וּלְאֵלַמּוֹ ^{▼▼For Ketiv וּלְאֵלַמּוֹ Qere= וּלְאֵלַמָּיו} סָבִיב׀ סָבִיב אֹרֶךְ חֲמִשִּׁים אַמָּה וְרֹחַב חָמֵשׁ וְעֶשְׂרִים אַמָּֽה׃ 34 וְאֵלַמּוֹ ^{▼▼For Ketiv וְאֵלַמּוֹ Qere= וְאֵלַמָּיו} לֶֽחָצֵר הַחִיצוֹנָה וְתִמֹרִים אֶל־אֵלוֹ ^{▼▼For Ketiv אֵלוֹ Qere= אֵלָיו} מִפּוֹ וּמִפּוֹ וּשְׁמֹנֶה מַעֲלוֹת מַעֲלוֹ׃ ^{▼▼For Ketiv מַעֲלוֹ׃ Qere= מַעֲלָֽיו׃} 35 וַיְבִיאֵנִי אֶל־שַׁעַר הַצָּפוֹן וּמָדַד כַּמִּדּוֹת הָאֵֽלֶּה׃ 36 תָּאוֹ ^{▼▼For Ketiv תָּאוֹ Qere= תָּאָיו} אֵלוֹ ^{▼▼For Ketiv אֵלוֹ Qere= אֵלָיו} וְאֵלַמּוֹ ^{▼▼For Ketiv וְאֵלַמּוֹ Qere= וְאֵֽלַמָּיו} וְחַלּוֹנוֹת לוֹ סָבִיב׀ סָבִיב אֹרֶךְ חֲמִשִּׁים אַמָּה וְרֹחַב חָמֵשׁ וְעֶשְׂרִים אַמָּֽה׃ 37 וְאֵילוֹ ^{▼▼For Ketiv וְאֵילוֹ Qere= וְאֵילָיו} לֶֽחָצֵר הַחִיצוֹנָה וְתִמֹרִים אֶל־אֵילוֹ ^{▼▼For Ketiv אֵילוֹ Qere= אֵילָיו} מִפּוֹ וּמִפּוֹ וּשְׁמֹנֶה מַעֲלוֹת מַעֲלוֹ׃ ^{▼▼For Ketiv מַעֲלוֹ׃ Qere= מַעֲלָֽיו׃} 38 וְלִשְׁכָּה וּפִתְחָהּ בְּאֵילִים הַשְּׁעָרִים שָׁם יָדִיחוּ אֶת־הָעֹלָֽה׃ 39 וּבְאֻלָם הַשַּׁעַר שְׁנַיִם שֻׁלְחָנוֹת מִפּוֹ וּשְׁנַיִם שֻׁלְחָנוֹת מִפֹּה לִשְׁחוֹט אֲלֵיהֶם הָעוֹלָה וְהַחַטָּאת וְהָאָשָֽׁם׃ 40 וְאֶל־הַכָּתֵף מִחוּצָה לָעוֹלֶה לְפֶתַח הַשַּׁעַר הַצָּפוֹנָה שְׁנַיִם שֻׁלְחָנוֹת וְאֶל־הַכָּתֵף הָאַחֶרֶת אֲשֶׁר לְאֻלָם הַשַּׁעַר שְׁנַיִם שֻׁלְחָנֽוֹת׃ 41 אַרְבָּעָה שֻׁלְחָנוֹת מִפֹּה וְאַרְבָּעָה שֻׁלְחָנוֹת מִפֹּה לְכֶתֶף הַשָּׁעַר שְׁמוֹנָה שֻׁלְחָנוֹת אֲלֵיהֶם יִשְׁחָֽטוּ׃ 42 וְאַרְבָּעָה שֻׁלְחָנוֹת לָעוֹלָה אַבְנֵי גָזִית אֹרֶךְ אַמָּה אַחַת וָחֵצִי וְרֹחַב אַמָּה אַחַת וָחֵצִי וְגֹבַהּ אַמָּה אֶחָת אֲלֵיהֶם וְיַנִּיחוּ אֶת־הַכֵּלִים אֲשֶׁר יִשְׁחֲטוּ אֶת־הָעוֹלָה בָּם וְהַזָּֽבַח׃ 43 וְהַֽשְׁפַתַּיִם טֹפַח אֶחָד מוּכָנִים בַּבַּיִת סָבִיב׀ סָבִיב וְאֶל־הַשֻּׁלְחָנוֹת בְּשַׂר הַקָּרְבָֽן׃ 44 וּמִחוּצָה לַשַּׁעַר הַפְּנִימִי לִֽשְׁכוֹת שָׁרִים בֶּחָצֵר הַפְּנִימִי אֲשֶׁר אֶל־כֶּתֶף שַׁעַר הַצָּפוֹן וּפְנֵיהֶם דֶּרֶךְ הַדָּרוֹם אֶחָד אֶל־כֶּתֶף שַׁעַר הַקָּדִים פְּנֵי דֶּרֶךְ הַצָּפֹֽן׃ 45 וַיְדַבֵּר אֵלָי זֹה הַלִּשְׁכָּה אֲשֶׁר פָּנֶיהָ דֶּרֶךְ הַדָּרוֹם לַכֹּהֲנִים שֹׁמְרֵי מִשְׁמֶרֶת הַבָּֽיִת׃ 46 וְהַלִּשְׁכָּה אֲשֶׁר פָּנֶיהָ דֶּרֶךְ הַצָּפוֹן לַכֹּהֲנִים שֹׁמְרֵי מִשְׁמֶרֶת הַמִּזְבֵּחַ הֵמָּה בְנֵֽי־צָדוֹק הַקְּרֵבִים מִבְּנֵֽי־לֵוִי אֶל־יְהוָה לְשָׁרְתֽוֹ׃ 47 וַיָּמָד אֶת־הֶחָצֵר אֹרֶךְ׀ מֵאָה אַמָּה וְרֹחַב מֵאָה אַמָּה מְרֻבָּעַת וְהַמִּזְבֵּחַ לִפְנֵי הַבָּֽיִת׃ 48 וַיְבִאֵנִי אֶל־אֻלָם הַבַּיִת וַיָּמָד אֵל אֻלָם חָמֵשׁ אַמּוֹת מִפֹּה וְחָמֵשׁ אַמּוֹת מִפֹּה וְרֹחַב הַשַּׁעַר שָׁלֹשׁ אַמּוֹת מִפּוֹ וְשָׁלֹשׁ אַמּוֹת מִפּֽוֹ׃ 49 אֹרֶךְ הָאֻלָם עֶשְׂרִים אַמָּה וְרֹחַב עַשְׁתֵּי עֶשְׂרֵה אַמָּה וּבַֽמַּעֲלוֹת אֲשֶׁר יַעֲלוּ אֵלָיו וְעַמֻּדִים אֶל־הָאֵילִים אֶחָד מִפֹּה וְאֶחָד מִפֹּֽה׃